L'appuntamentu

Mi ggiru e mi riggiru n'tra lu lettu

arriru e penzu comu fussi ora

a quannu ti stringeva n'ta lu pettu

e tu scappavi sutta li linzola.


N'tà li me vrazza poi t'addurmiscevi

stanca d'amuri e Jù ti taliava,

comu na picciridda mi parevi

e senza sciatari... tutta ti vasava...


Sentu ancora lu sciauru di tia

quannu sulu 'ppa casa mi furriu,

dannata e maliditta gilusia

tu nun c'intravi,u tortu è sulu miu!


Amuri miu,mi poi pirdunari?

n'tà stù missaggiu miu chinu d'amuri

c'è scrittu ca su ancora mi voi 'bbeni

stasira e novi, o nostru postu veni!


Sunu li novi,e lu sgrusciu di lu mari

m'arricorda li me e li tò suspiri....

a luna ca ni stava a taliari

cumpagna ruffiana e tanti siri.


I novi e cincu,ancora tu non veni

e stù pinzeri mi fà stari mali....

I novi e 'ddeci,m'addumu a sicaretta,

passa cchiù prestu u tempu ppì ccù aspetta....


I novi e n'quartu,li spiranzi perdu...

ommai nun veni cchiù, si fici tardu!

I novi e 'vvinti,minn'accuminciu a ghjiri...

di mia, nun ni voli cchiù sapiri....


Ripigghiu strata, sentu sgrusciu... mi giru...

forsi si tu, si, si,... ora ti viru...

mi pari n'sognu, tu, curri versu i mia....

nun mi trattegnu cchiù,chiamu....MARIA...


L'ultimi passi....m'abbatti forti u cori....

e, comu n'filmi a rallentatori

ti pigghiu n'coddu,mi veni d'impazziri...

filici isu l'occhi....a luna arriri !

Inviata da Privitera Francesca